Noyabrın 4-də Şirvan-Salyan Regional Təhsil İdarəsinin Zəfər Günü ilə bağlı təşkil etdiyi tədbirdə iştirak etdim.
İlk olaraq Ümummilli Lider Heydər Əliyevin abidəsini ziyarət edərək önünə gül dəstələri qoyduq, Vətənimiz uğrunda canından keçmiş qəhrəmanlarımızın uyuduğu Şəhidlər xiyabanını ziyarət etdik.
Sonra isə Salyan şəhər 2 saylı tam orta məktəbdə şagirdlərin Azərbaycanımızın qələbəsinə, Zəfər Gününə və Şuşa ilinə həsr edilmiş əl işləri, eləcə də İT sahəsini əhatə edən texnoloji bacarıqları ilə tanış olduq.
8 Noyabr – Zəfər Gününə həsr edilmiş tədbir, Salyan Rayon İcra Hakimiyyətinin başçısı Sevindik Hətəmov, Biləsuvar Rayon İcra Hakimiyyəti başçısının müavini Ləman Yüzbaşova, Şirvan-Salyan Regional Təhsil İdarəsi müdiri Sənan Mənsimli, Milli Qəhrəman Mübariz İbrahimovun atası Ağakərim İbrahimov, YAP rayon təşkilatlarının sədrləri, Səfərbərlik və Hərbi Xidmətə Çağırış üzrə Dövlət Xidmətinin rayon şöbələrinin rəhbərləri, rayon təhsil sektoru müdirləri, məktəb direktorları, şəhid ailələri və qazilərin iştirakı ilə məktəbin akt zalında davam etdi.
Salyan RİH-in başçısı Sevindik Hətəmov, Təhsil İdarəsinin müdiri Sənan Mənsimli, Milli Qəhrəman Mübariz İbrahimovun atası Ağakərim İbrahimov çıxışlarında hər bir azərbaycanlının qəlbində yüksək qürur hissləri yaradan şanlı tarixi qələbəmizdən, Müzəffər Ali Baş Komandanın rəhbərliyi altında Möhtəşəm Zəfərə imza atan Ordumuzun qüdrətindən, şəhadətə yüksələn və sağlamlığını itirən əsgər və zabitlərimizin qəhrəmanlığından söz açdılar.
Çıxışımda Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin rəhbərliyi və Şanlı Azərbaycan Ordusunun misilsiz qəhrəmanlığı sayəsində qazandığımız Möhtəşəm Qələbənin Azərbaycan xalqına yaşatdığı qürur hisslərindən, şəhid və qazilərimizin qəhrəmanlığından danışdım. Bildirdim ki, düşmənə qan uddurmuş igidlərimizin cəsurluğu, döyüş meydanında nümayiş etdirdikləri şücaətlər gələcək nəsillər üçün örnək, Vətənə sevgini, vətənpərvərliyi, torpağına bağlılığı aşılayan qəhrəmanlıq məktəbidir. Azərbaycan xalqına misilsiz qələbə sevinci, yüksək fəxarət duyğuları, hədsiz fərəh hissləri yaşatmış qəhrəmanlarımızın əziz xatirələri daim qəlbimizdə yaşayacaqdır.
Jalə Əhmədova
Millət Vəkili