“Beynəlxalq nüfuzu getdikcə artan Azərbaycan xarici əlaqələrin inkişaf etdirilməsinə hər zaman xüsusi diqqətlə yanaşır. Ölkə Prezidenti İlham Əliyevin rəhbərliyi ilə dövlətimizin həyata keçirdiyi uğurlu diplomatiya və xarici siyasət kursu, Azərbaycanın ən mötəbər beynəlxalq təşkilatlarda üzvlüyü və fəallığı faktı həmin təşkilatların digər üzvlərinin ölkəmizə marağını və diqqətini daim artırır”.

Bu sözləri mətbuata açıqlamasında Azərbaycan Respublikası Milli Məclisinin deputatı Kamaləddin Qafarov deyib.

Millət vəkili qeyd edib ki, bu gün Azərbaycan 120 ölkəni bir araya gətirən və BMT-dən sonra dünyada ikinci ən böyük beynəlxalq təsisat olan Qoşulmama Hərəkatının sədri kimi beynəlxalq arenada mühüm rol oynayır. “Ölkəmiz bu təsisatın sədrliyinə 2019-cu ildən və bütün üzv dövlətlərin yekdil səsi ilə seçilmişdir. Bu da Azərbaycanın mövqeyinə və siyasətinə yüksək səviyyəli dəstəyi və rəğbəti nümayiş etdirən bir haldır. Ölkəmizin Qoşulmama Hərəkatının sədri kimi fəaliyyətinin yüksək səmərəliliyi, ötən müddət ərzində irəli sürdüyü təşəbbüslərin effektivliyi buna səbəb oldu ki, Azərbaycanın təşkilata sədrliyi bir daha yekdil qərarla 2023-cü ilin sonuna qədər uzadıldı. Həmçinin Azərbaycan 2006-cı ildən Ərəb Dövlətləri Liqasının müşahidəçi statusunda üzvüdür və bu gün mövcud əməkdaşlığı daha da genişləndirmək üçün böyük imkanlar var. Bu baxımdan Azərbaycan Prezidenti cənab İlham Əliyevin cari il noyabrın 1-də Əlcəzair Xalq Demokratik Respublikasının paytaxtı Əlcəzair şəhərində Ərəb Dövlətləri Liqasının 31-ci Zirvə toplantısında iştirakı xüsusi əhəmiyyət kəsb edir.”.

K.Qafarov deyib: “Bu gün dünyada özlərini demokratiya carçısı kimi təbliğ edən bəzi Qərb dövlətləri nahaq yerə düşünürlər ki, onların yüz illər boyunca həyata keçirdikləri aqressiv xarici siyasətlərinin, apardıqları işğalçı müharibələrin izləri zamanla silinib gedəcək. O cümlədən, Azərbaycanı öz ərazi bütövlüyünü təmin etmək üçün, sırf BMT Nizamnaməsinin 51-ci maddəsində nəzərdə tutulmuş özünümüdafiə hüququndan istifadə edərək apardığı və tarixi Qələbə ilə başa vurduğu ədalətli Vətən müharibəsinə görə qınamağa cəhd edən Fransa hökuməti yaxşı olardı ki, yüz ildən çox bir müddət ərzində Əlcəzair xalqına qarşı apardığı dəhşətli işğalçı müharibə nəticəsində ölümünə səbəb olduğu 1,5 milyon əlcəzairlinin qanı barədə düşünsün. Əlcəzairə Milli Azadlıq Günündə, Milli Ləyaqət Günündə etdiyi səfər çərçivəsində möhtərəm Prezidentimiz İlham Əliyev Şəhidlər memorialını, eləcə də Mücahidlər Muzeyini ziyarət edərək Əlcəzair xalqının öz azadlığı uğurunda verdiyi şəhidlərin xatirəsini yad etmişdir. Bundan sonra dövlətimizin başçısı Sammitdə etdiyi çıxışında Fransanın Əlcəzair xalqına qarşı törətdiyi zorakılığı, kütləvi qəddarlığı bir daha kəskin şəkildə pisləmiş və qeyd etmişdir ki, dünya heç zaman bu faciəni unutmamalıdır. Azərbaycan Prezidenti vurğulamışdır ki, dünya birliyi gələcəkdə belə faciələrin qarşısının alınması üçün əlindən gələni etməlidir.”

K.Qafarov Azərbaycanın Ərəb Dövlətləri Liqasının Zirvə toplantısında təmsil olunmasının ölkəmiz üçün önəmli hadisə olduğunu qeyd edərək deyib: “Məlumdur ki, Azərbaycan da uzun müddət ərzində Əlcəzair kimi işğaldan əziyyət çəkib. Bizim torpaqlarımız otuz il Ermənistanın işğalı altında qalmışdı. Bütün bu işğal illəri ərzində Azərbaycan həmişə ərəb ölkələrinin, İslam Əməkdaşlıq Təşkilatına üzv olan dövlətlərin dəstəyini hiss edib. Dövlət başçımızın Sammitdəki çıxışında qeyd olunduğu kimi, Ərəb Dövlətləri Liqasının Zirvə toplantısında təmsil olunmaq Azərbaycan üçün əlamətdar hadisədir. Sözügedən fakt dostluq və qardaşlıq əlamətidir və ölkələrimiz arasında birliyi nümayiş etdirir. Ərəb Dövlətləri Liqası ilə Azərbaycan arasındakı münasibətlərin xüsusi xarakteri vardır və bu gün həmin münasibətləri daha da dərinləşdirmək, inkişaf etdirmək üçün geniş imkanlar yaranıb.”